शिवबा

*शिवबा*

शिवबा तुझ्या राज्यामध्ये
तुझ्यावरून वाद आहे
कोण स्विकारी विचारांना
श्रेयामध्येच स्वाद आहे

जन्म तुझा झाला कधी
यावरून खल आहे
सांगती जे मार्ग तुझा
त्यांची डोळ्यात सल आहे

खोटेपणा पेरण्यात
भामटयांची भर आहे
तुझ्या विचारांची शिवबा
चौकाचौकात टर आहे

उदोउदोसाठीच शिवबा
तुझा होतो वापर आहे
कसे पिणार विचारांना
फुटके हाती खापर आहे

अशिर्वादासाठी तुझ्या
इथे लागली स्पर्धा आहे
जो तो सांगे मोठेपणा
वागणुकीत अर्धा आहे

कोणी म्हणे भगवा आहे
विरोधक हिरवा आहे
मानवतेच्या लाढाईची
येथे कुणास पर्वा आहे

आरमाराच्या जनका
समुद्रात तुझा थाट आहे
पाण्यात पाही दुस-यांना
कधी कात्रजचा घाट आहे

तुझ्या विचारांची ज्वाळा
मनामनात जळत आहे
कोण झटतो कशासाठी
प्रत्येकाला कळत आहे

मनामनात आमच्या तुझे
भव्यदिव्य स्मारक आहे
तेच स्वप्न करील पूर्ण
तेच जगा तारक आहे

कनाकनात राष्ट्राच्या
तुझी भव्य मूर्ती आहे
मनामनात कणाकणातुन
तुझी दिव्य स्फूर्ती आहे

✍🏻श्रीकृष्ण उबाळे,बीड
     मो.9405344642
aajchitika.blogspot.in