आमची युती

आमची युती
----------------
काल आमच्या म्हशीचं काढायला गेलो दूध
तिनं दिली लाथ मला राहिली नाही सुध

शुद्धीवर आल्यावर लागलो मी रडायला
म्हस बेमान लागली भाषण झोडायला

मी म्हणलं माय हे हाय कशाचं दर्शक?
म्हणे आपल्यात व्यवहार ठेऊ पारदर्शक

मी म्हणलं म्हसे काय बोलती तुझ्या मायला
पेंडीसोबत अल्ता म्हणे 'तरुण भारत' खायला

दूध माझं खाऊन म्हणे का देता मला दंश?
'गो' सोबत माझाही का वाचवला नाही वंश?

तुम्ही माणसं फालतू बंदया कसल्या घालता
नोटबंदीचा परिणाम माझ्या खुराकावर आलता

डबल मला पाहिजे लगेच वाढवून पेंढ
नाहीतर आपल्या युतीचा झालाच बघ एंड

मालक असाल तुम्ही मी हाय फार सनकी
माझी सुद्धा ऐकत जा बात थोडी मानकी

मुंबैसारख दूध तुम्हाला देईन म्हणे वाटून
वाट्यातलं माझ्या मिळणार नाही छाटून

देऊन मनासारखं मी केली तिची स्तुती
दूध दिलं काढून तिने झाली आमची युती

✍🏻श्रीकृष्ण उबाळे,बीड
     मो.९४०५३४४६४२